Programm – 2025 – Programme

Il-Carmelite Institute Malta qed jippreżenta l-programm ta’ attivitajiet għas-sena 2025-26, li se jkun qed idur bis-sħiħ madwar San Ġwann tas-Salib, hekk kif il-Karmelu fl-2026 se jfakkar it-300 sena mill-kanonizzazzjoni tiegħu u 100 sena mid-Dottorat. Il-programm jiftaħ b’kors li jibda f’Novembru u jibqa’ sejjer sa’ April, imbagħad f’Mejju jkollna wkoll irtir li fih nirriflettu u nimmeditaw fuq il-mixja spiritwali tagħna mgħejunin mid-duttrina ta’ San Ġwann tas-Salib. Għal din is-sena hemm il-ħsieb li noffru wkoll pellegrinaġġ fuq il-passi tad-‘Duttur Mistiku ’ fi Spanja. Matul is-sena se jsiru wkoll klassijiet ta’ Meditazzjoni Nisranija fit-tradizzjoni Karmelitana, u li se jkunu ispirati mit-tagħlim ta’ San Ġwann tas-Salib sabiex insaħħu t-taħriġ tagħna. B’kollaborazzjoni mal-Jesuit Foundation u l-Akkademja tal-Malti, l-Istitut se jkun qed jorganizza wkoll żewġ attivitajiet kulturali: rappreżentazzjoni teatrali tal-Kastell Ġewwieni ta’ Santa Tereża ta’ Ġesù kif ukoll taħdita fuq l-arkivju u l-librerija ta’ Mario Azzopardi mħollija minnu lill-Istitut Karmelitan.

Nistednukom bil-qalb tingħaqdu magħna f’din il-mixja tar-ruħ u għal aktar tagħrif tistgħu tiktbulna fuq istitut@karmelitani.org